Ka Sohkha Mission Village Durbar haka 8 tarik Nailar kala pynlong iaka Seminar ba shisngi ban pynshai shaki khynnah skul halor ka jingkordor ban ioh iaka jingkoit jingkhiah kaba iadei bad ka jingmut jingpyrkhat ne Mental Health.
Ia kane ka Seminar kaba la pynlong ha Community Hall Sohkha Mission, la kyrshan lyngba ka ophis u Deputy Commissioner (Planning), West Jaintia Hills District hapoh ka Chief Minister’s Youth Development Scheme jong u snem 2023-2024.
Ia kane ka seminar la pynlong kyrpang ruh na ka bynta ki khynnah Class X, XI bad XII jong ka skul Sohkha Govt. Higher Secondary School, khnang ba kin sngewthuh ia kiba bun ki bynta haba iadei bad ka jingpang kaba ktah iaka jingmut jingpyrkhat kum ka jingsngewsih kaba sha palat, ka jingdiaw mynsiem, ka jingduh jingkyrmen, bad ka jingsngew long marwei kaba lam pat shaka jingkwah pynmynsaw ialade.
U Bah David H. Blah Head Department Psychology St Edmund’s College, Shillong kum u riew shemphang jong kane ka sngi ula batai bniah halor ki dak ki shin, ki daw, bad kumno ka ktah iaka jingim jong u/ka briew.
Ula ong, haki khynnah, kane ka jingpang ka ktah namar bunsien ki kmie ki kpa kim lah ban ithuh ba ki khun ki kham pher ka leit ka wan bad ka ktien ka thylliej.
Ula kyntu iaki khynnah ban iaishah bad ialeh pyrshah iaki jingeh lada ki wan ha ka jingim ka jong ki khnang ba kin ioh iaka jingkoit jingkhiah ba pura haka jingmut jingpyrkhat bad ban lah ban ai ki jingai kiba bha tam iaka ïing ka sem bad ka shnong ka thaw hi baroh kawei.
Iaka jingialang la pyniaid da u Chairmam V.L. Gadew bad la ioh ruh ka jingkren lyngkot na u Waheh shnong Sohkha Mission Ma PS. Suchen, ka Dr. Rimika Lanong Assistant Teacher Sohkha Govt. Higher Secondary School.
Iaka seminar la pynwai da ki kyntien khublei na u General Secretary shnong Ma M. Manner.
Continue Reading